ព្រះគម្ពីរម៉ាកុស ១៥:១-១៥

^១ដល់ព្រឹកឡើង កាលពួកសង្គ្រាជ ពួកចាស់‌ទុំ នឹងពួកអាចារ្យ ព្រមទាំងក្រុម‌ជំនុំទាំងអស់បានប្រជុំពិគ្រោះគ្នា នោះក៏ចងព្រះ‌យេស៊ូវ នាំបញ្ជូនទៅឯលោកពីឡាត់ ^២លោកពីឡាត់ពិចារណាសួរទ្រង់ថា តើអ្នកជាស្តេចរបស់សាសន៍យូដាឬអី ទ្រង់មានបន្ទូលឆ្លើយថា ត្រូវដូចលោកមានប្រសាសន៍ហើយ ^៣ឯពួកសង្គ្រាជ គេចោទប្រកាន់ទ្រង់ខ្លាំងណាស់ ^៤នោះលោកពីឡាត់ក៏ពិចារណាសួរទ្រង់ម្តងទៀត ដោយពាក្យថា តើអ្នកមិនព្រមឆ្លើយសោះទេឬអី មើល រឿងជាច្រើនទាំងម៉្លេះ ដែលគេធ្វើបន្ទាល់ទាស់នឹងអ្នក ^៥តែព្រះ‌យេស៊ូវទ្រង់ឥតមានឆ្លើយអ្វីទៀតសោះ បានជាលោកពីឡាត់ក៏អស្ចារ្យក្នុងចិត្ត។ ^៦រីឯនៅបុណ្យនោះ លោកតែងធ្លាប់លែងអ្នកទោសម្នាក់ឲ្យដល់គេតាមដែលគេសូម ^៧គ្រានោះ មានម្នាក់ឈ្មោះបារ៉ា‌បាស ជាប់គុកជាមួយនឹងពួកអ្នកបះ‌បោរ ជាអ្នកដែលបានសំឡាប់គេក្នុងវេលាបះនោះ ^៨ហ្វូងមនុស្សក៏ចាប់តាំងស្រែកឡើង សូមលោកបើកឲ្យដល់គេ ដូចជាលោកតែងធ្លាប់ធ្វើមក ^៩លោកពីឡាត់សួរគេថា តើចង់ឲ្យខ្ញុំលែងស្តេចសាសន៍យូដា ឲ្យដល់អ្នករាល់គ្នាឬអី ^១០នេះដ្បិតលោកជ្រាបថា ពួកសង្គ្រាជបានបញ្ជូនទ្រង់ ដោយឈ្នានីសទេ ^១១តែពួកសង្គ្រាជបានញុះ‌ញង់ហ្វូងមនុស្ស ឲ្យសូមឲ្យលោកលែងបារ៉ា‌បាសវិញ ^១២លោកពីឡាត់ក៏សួរគេម្តងទៀតថា ដូច្នេះ តើចង់ឲ្យខ្ញុំធ្វើអ្វីនឹងអ្នកដែលអ្នករាល់គ្នាហៅថា ស្តេចសាសន៍យូដានេះ ^១៣គេស្រែកឡើងទៀតថា ចូរឆ្កាងវាទៅ ^១៤លោកពីឡាត់សួរគេថា ដូច្នេះ តើគាត់បានធ្វើខុសអ្វី នោះគេស្រែកកាន់តែខ្លាំងឡើងថា ចូរឆ្កាងវាទៅ ^១៥ឯពីឡាត់ លោកចង់ធ្វើបំពេញដល់ចិត្តហ្វូងមនុស្សដែរ បានជាលែងបារ៉ា‌បាសដល់គេ រួចកាលបានវាយព្រះ‌យេស៊ូវដោយរំពាត់ហើយ នោះក៏បញ្ជូនទៅឲ្យគេឆ្កាងទ្រង់។

ព្រះគម្ពីរ ម៉ាកុស ១៥:១-១៥